Yangiliklar

O‘zbekiston va Xitoy turizm sohasidagi hamkorlikni kengaytirmoqda

21 may kuni Sian shahrida (XXR) “Oʻzbekiston – Xitoy III mintaqalararo forumi” doirasida ikki davlat oʻrtasida turizm sohasidagi hamkorlikni rivojlantirishga bagʻishlangan ixtisoslashtirilgan forum boʻlib oʻtdi.

Tadbir davomida O‘zbekiston va Xitoy o‘rtasidagi turizm aloqalarini kengaytirish, qo‘shma sayyohlik yo‘nalishlarini shakllantirish, shuningdek, sohada yangi sarmoyaviy loyihalarni amalga oshirish masalalari muhokama qilindi.

Forumda O‘zbekiston Respublikasi Turizm qo‘mitasi raisi Abdulaziz Akqulov boshchiligidagi delegatsiya, shuningdek, O‘zbekistonda faoliyat yuritayotgan sayyohlik kompaniyalari, sayyohlik va rekreasiya zonalari, sayyohlik majmualari va aviatashuvchilarning 40 dan ortiq vakillari ishtirok etdi.

Qayd etilishicha, turizmning forumning asosiy yo‘nalishlari qatoriga kiritilishi uning ikki davlat o‘rtasidagi strategik hamkorlik doirasidagi ahamiyatini ta’kidlaydi.

Abdulaziz Oqqulov o‘z nutqida Xitoy brendlari ostida o‘rta va yuqori toifali mehmonxonalar ochish, shuningdek, O‘zbekistonning turistik hududlarida kurortlar, sanatoriylar va oilaviy va faol dam olish maskanlarini rivojlantirish imkoniyatlarini ko‘rib chiqib, xitoylik sayyohlar uchun turistik yo‘nalishlarni kengaytirishni taklif qildi.

Shuningdek, Xitoyning ilg‘or tajribasi va texnologiyasidan foydalangan holda tematik bog‘lar va ko‘ngilochar majmualar yaratish, ishbilarmonlik turizmini (MICE) rivojlantirish, xalqaro korporativ tadbirlar, banklar va assotsiatsiyalarni jalb qilish, mintaqaviy MICE saytlarini targ‘ib qilish tashabbuslari ilgari surildi.

Forum davomida O‘zbekiston hududlarining turizm salohiyati, jumladan, Buxoroning tarixiy-madaniy merosi, Qashqadaryo viloyatining ekoturizm va ziyorat turizmi sohasidagi imkoniyatlari, Samarqandning jahon sivilizatsiyasidagi ahamiyati, shuningdek, Toshkent shahri va Toshkent viloyatining turizm infratuzilmasi kabi mavzularda taqdimotlar o‘tkazildi.

Shuningdek, ishtirokchilarga “Miraki” va “Arda Xiva” sayyohlik majmualari, Aydarko‘l hududidagi ekoturizm yo‘nalishlari hamda “Amirsoy tog‘ kurorti” salohiyati taqdim etildi.

O‘zbekistonda turizm sohasida amalga oshirilayotgan islohotlar, yangi yo‘nalishlar, mehmonxona infratuzilmasi va xorijiy investorlar uchun yaratilgan shart-sharoitlarga alohida e’tibor qaratildi.

Forum doirasida ikki mamlakatning 200 dan ortiq turoperatorlari va turizm sohasi vakillari ishtirokida hamkorlikni kengaytirish va O‘zbekistonga sayyohlar oqimini oshirishga qaratilgan B2B uchrashuvlari o‘tkazildi.



Manba