Yangiliklar

O‘zbekiston, Tojikiston va Belarus turoperatorlari hamkorlikni kengaytiradi

O‘zbekiston, Tojikiston va Belarus turizm sohasi vakillari to‘g‘ridan-to‘g‘ri ishbilarmonlik aloqalarini kengaytirish va qo‘shma turistik mahsulotlar yaratishni muhokama qildilar. Uchrashuv 22-sentyabr kuni Dushanbeda tegishli davlat organlari vakillari va uch mamlakat turoperatorlari ishtirokida bo‘lib o‘tdi. Bu haqda O‘zbekiston Respublikasi Turizm qo‘mitasi xabar bermoqda.

Ishtirokchilar tarkibiga O‘zbekiston Turizm qo‘mitasi delegatsiyasi, Tojikiston Hukumati huzuridagi Turizmni rivojlantirish qo‘mitasi vakillari, Belarusning «Milliy turizm agentligi» DQ va turoperatorlar kirdi.

Uchrashuv davomida o‘zbek tomoni turizm sohasida amalga oshirilayotgan islohotlar, turistik infratuzilmani rivojlantirish, yangi turistik mahsulotlar yaratish hamda soha tadbirkorlarini davlat tomonidan qo‘llab-quvvatlash choralari, jumladan, ajratilayotgan subsidiyalar haqida ma’lumot taqdim etdi.

Asosiy e’tibor uch mamlakat turoperatorlari o‘rtasidagi hamkorlikni kengaytirishga qaratildi. Tomonlar qo‘shma turistik mahsulotlar ishlab chiqish va ularni uchinchi davlatlar bozorlarida ilgari surish imkoniyatini ko‘rib chiqdilar.

O‘zbekiston va Tojikistonning turistik yo‘nalishlarini Belarus ishtirokidagi turpaketlarga integratsiya qilish alohida muhokama qilindi. Potensial qo‘shma takliflar madaniy-ma’rifiy, ekologik, gastronomik, tibbiy va ziyorat turizmini qamrab olishi mumkin.

Ishtirokchilar, shuningdek, amaliy hamkorlikni yanada rivojlantirish bo‘yicha fikr almashdilar. Taklif etilgan formatlar orasida o‘zaro axborot turlari va taqdimotlar, B2B uchrashuvlar o‘tkazish hamda xalqaro turizm ko‘rgazmalarida birgalikda ishtirok etish bor.

O‘zbekiston vakillari Tojikiston va Belarus turistik kompaniyalarini 31-Toshkent xalqaro turizm yarmarkasi «Ipak yo‘lida turizm» (TMTYa–2026)da ishtirok etishga taklif qildilar. Tadbir 25–27 noyabr kunlari Toshkentda bo‘lib o‘tadi. Yarmarka doirasida investitsiya forumi ham o‘tkaziladi.

Uchrashuv yakunlariga ko‘ra, tomonlar xususiy sektor vakillari o‘rtasida muntazam muloqotni davom ettirishga, yangi tashabbuslarni birgalikda ishlab chiqishga va ularning amaliy amalga oshirilishini ta’minlashga tayyor ekanliklarini bildirdilar.

Manba